Gəncədə 2 İyul – Azərbaycan Polisi Gününə həsr olunmuş tədbir keçirilib. Tədbirdə Gəncə Şəhər İcra Hakimiyyətinin başçısı, Gəncə Şəhər Baş Polis İdarəsinin rəisi, polis general-mayoru, Gəncə Şəhər Məhkəməsinin sədri, Gəncə Ağır Cinayətlər Məhkəməsinin sədri, hüquq-mühafizə orqanlarının, idarə, müəssisə və təşkilatların rəhbərləri, eləcə də polis əməkdaşları iştirak ediblər.

Əvvəlcə tədbir iştirakçıları şəhərin mərkəzi meydanında Ümummilli Lider Heydər Əliyevin abidəsini ziyarət edərək önünə gül dəstələri düzüblər.

Gəncə Şəhər Baş Polis İdarəsində keçirilən tədbirdə bildirilib ki, Ümummilli Lider Heydər Əliyevin 1998-ci ildə imzaladığı Fərmana əsasən, hər il 2 iyul tarixi Azərbaycan Polisi Günü kimi qeyd olunur. Vurğulanıb ki, Ulu Öndərin 1993-cü ildə xalqın təkidli tələbi ilə yenidən hakimiyyətə qayıdışından sonra hüquq-mühafizə orqanlarının fəaliyyətində əsaslı dönüş yaranıb, mütəşəkkil cinayətkarlığa, korrupsiyaya, terrorizmə və narkotik vasitələrin qanunsuz dövriyyəsinə qarşı mübarizə daha da gücləndirilib.

Çıxışlarda qeyd olunub ki, Prezident cənab İlham Əliyev tərəfindən bu siyasət uğurla davam etdirilir. Dövlət başçısının Azərbaycan polisinə göstərdiyi diqqət və qayğı nəticəsində daxili işlər orqanlarının maddi-texniki bazası əhəmiyyətli dərəcədə möhkəmləndirilib, əməkdaşların sosial rifahının yüksəldilməsi istiqamətində mühüm addımlar atılıb. O da qeyd olunub ki, Gəncə şəhərində polis əməkdaşları ictimai asayişin qorunması, vətəndaşların təhlükəsizliyinin təmin edilməsi və kriminogen vəziyyətin nəzarətdə saxlanılması istiqamətində üzərlərinə düşən vəzifələri layiqincə yerinə yetirirlər.

Daha sonra Gəncə Şəhər İcra Hakimiyyətinin başçısının müvafiq Sərəncamına əsasən, xidmətdə fərqlənən bir qrup polis əməkdaşı 2 İyul – Azərbaycan Polisi Günü münasibətilə "Fəxri fərman"la təltif edilib, həmçinin onlara hədiyyələr təqdim olunub.

Sonda xatirə şəkli çəkdirilib.