Gəncə Şəhər İcra Hakimiyyətinin başçısı Niyazi Bayramovun verdiyi tapşırığa uyğun olaraq şəhərin müxtəlif ərazilərində abadlıq, təmir-bərpa və yaşıllaşdırma işləri davam etdirilir.

Şəhər rəhbəri görülən işlərin gedişi ilə yerində tanış olmaq məqsədilə Gəncənin Xan Bağına, Nizami Gəncəvi Məqbərəsinə, Cavad xan küçəsinə, Şah Abbas Cümə Məscidinə və Cavad xan türbəsinə baxış keçirib.

Ərazilərdə aparılan işlərlə tanış olan Niyazi Bayramov yay mövsümü ilə əlaqədar yaşıllıq zolaqlarına xüsusi diqqət yetirilməsinin vacibliyini vurğulayıb. Şəhər rəhbəri ağac və gül kollarına aqrotexniki qulluğun vaxtında həyata keçirilməsi, suvarma işlərinin mütəmadi aparılması, eləcə də ərazilərin səliqə-sahmanının qorunması ilə bağlı aidiyyəti qurumlara müvafiq tapşırıqlar verib.

Xan Bağında olduğu zaman Niyazi Bayramov Şəki şəhərində keçiriləcək Respublika Gənclər Debat Forumunda iştirak edəcək universitet tələbələri ilə də görüşüb. Bildirilib ki, tələbələr "Şəhərsalma və memarlıq ili" çərçivəsində təşkil olunacaq forumda Gəncəni təmsil edəcəklər. Şəhər rəhbəri gənclərlə söhbət zamanı onlara öz tövsiyələrini verib, forumda uğurlu çıxış edəcəklərinə əminliyini ifadə edərək müvəffəqiyyət arzulayıb.

Daha sonra Niyazi Bayramov müharibə iştirakçıları və şəhid ailələrinin üzvləri ilə görüşüb, onların müraciət və təkliflərini dinləyib. Görüş zamanı qaldırılan məsələlərin aidiyyəti üzrə araşdırılması və həlli istiqamətində müvafiq tapşırıqlar verilib.