Gəncə Şəhər İcra Hakimiyyəti başçısının müavini Adil Tağıyev və “Gəncə Avtomobil Zavodu” İstehsalat Birliyinin direktoru Kamran Nəzərov Belarus Respublikasının Qomel şəhərində keçirilən XX Qomel İqtisadi Forumunda iştirak edirlər.

Forum çərçivəsində nümayəndə heyəti “Qomselmaş” Açıq Səhmdar Cəmiyyətində olub, burada istehsal olunan kənd təsərrüfatı texnikaları ilə tanış olublar. Bildirilib ki, “Qomselmaş” yalnız fərdi maşınlar deyil, müxtəlif təyinatlı model xətlərinə malik texnikalar da istehsal edir. Bu isə torpağın becərilməsi və səpin prosesindən məhsul yığımınadək bitkiçilik sahəsində əsas texnoloji mərhələlərin vahid istehsalçı tərəfindən təmin olunmasına imkan yaradır.

Görüş zamanı “Gəncə Avtomobil Zavodu” İB ilə “Qomselmaş” ASC arasında əməkdaşlıq əlaqələrindən və tərəfdaşlığın inkişaf perspektivlərindən də bəhs edilib.

Qeyd edək ki, XX Qomel İqtisadi Forumu illərdir beynəlxalq ticarət-iqtisadi və investisiya əməkdaşlığının aktual məsələlərinin müzakirə olunduğu, regionlararası və kooperasiya əlaqələrinin genişləndirildiyi nüfuzlu platformalardan biri hesab olunur. Yubiley xarakteri daşıyan forum iştirakçılarına regionun iqtisadi potensialı ilə yaxından tanış olmaq, strateji sessiyalarda iştirak etmək, yeni tərəfdaşlıqlar qurmaq və qarşılıqlı faydalı müqavilələr imzalamaq imkanı yaradır.