Məlum olduğu kimi, Gəncə Şəhər İcra Hakimiyyəti başçısının müavini Adil Tağıyev və “Gəncə Avtomobil Zavodu” İstehsalat Birliyinin direktoru Kamran Nəzərov Belarus Respublikasının Qomel şəhərində keçirilən XX Qomel İqtisadi Forumunda iştirak edirlər.

Forum çərçivəsində keçirilən rəsmi tədbirlər zamanı Adil Tağıyev Qomel vilayətinin qubernatoru İvan Krupko ilə görüşüb. Görüş zamanı Adil Tağıyev Gəncə Şəhər İcra Hakimiyyətinin başçısı Niyazi Bayramovun salamlarını çatdırıb.

Səmimi şəraitdə keçən görüşdə Gəncə ilə Qomel arasında mövcud əməkdaşlıq əlaqələrindən bəhs olunub, qarşılıqlı münasibətlərin daha da genişləndirilməsi istiqamətində fikir mübadiləsi aparılıb.

Qeyd edək ki, XX Qomel İqtisadi Forumu illərdir beynəlxalq ticarət-iqtisadi və investisiya əməkdaşlığının aktual məsələlərinin müzakirə olunduğu, regionlararası və kooperasiya əlaqələrinin genişləndirildiyi nüfuzlu platformalardan biri hesab olunur. Yubiley xarakteri daşıyan forum iştirakçılarına regionun iqtisadi potensialı ilə yaxından tanış olmaq, strateji sessiyalarda iştirak etmək, yeni tərəfdaşlıqlar qurmaq və qarşılıqlı faydalı müqavilələr imzalamaq imkanı yaradır.