Sənaye və Texnologiyalar üzrə Gəncə Dövlət Peşə Təhsil Mərkəzində 2025–2026-cı tədris ilinin məzunlarına həsr olunmuş "Məzun Günü" tədbiri keçirilib.

Tədbirdə Mərkəzin direktoru Elmir Cəfərov, Gəncə Şəhər İcra Hakimiyyətinin əməkdaşı Sənubər Qocayeva, T. Hacıyev adına 2 nömrəli Musiqi Məktəbinin direktoru Leyla Xəlilova, işəgötürən qurumların nümayəndələri, şəhid ailələrinin üzvləri, müəllimlər, valideynlər və tələbələr iştirak ediblər.

Əvvəlcə Ulu Öndər Heydər Əliyevin və şəhidlərin xatirəsi bir dəqiqəlik sükutla yad olunub, ardınca Dövlət Himni səsləndirilib.

Çıxış edən rəsmilər məzunları təbrik edərək onlara gələcək təhsil və peşə fəaliyyətlərində uğurlar arzulayıb, qazandıqları bilik və bacarıqların gələcək karyeralarında mühüm rol oynayacağını vurğulayıblar.

Tədbir çərçivəsində tələbələrin hazırladıqları musiqi və rəqs nömrələri təqdim olunub. Eyni zamanda, tədris ili ərzində fəallığı və nailiyyətləri ilə seçilən tələbələr, eləcə də müəllimlər "Təşəkkürnamə"lərlə təltif ediliblər.

Məzun Günü tədbiri məzunların birgə rəqsi, xatirə şəkillərinin çəkdirilməsi və xoş təəssüratlarla başa çatıb.