Gəncə Şəhər İcra Hakimiyyətinin başçısı Niyazi Bayramov N.Aydın adına 18 nömrəli tam orta məktəbdə şəhər sakinləri ilə növbəti səyyar görüş keçirib.

Görüşdə YAP Gəncə şəhər təşkilatının sədri Bayram Aslanov, Gəncə Şəhər İcra Hakimiyyəti başçısı Aparatının məsul əməkdaşları, bələdiyyə sədrləri, idarə, müəssisə və təşkilat rəhbərləri iştirak ediblər.

Əvvəlcə rəsmilər məktəbin şəhid məzunlarının əziz xatirəsinə həsr olunmuş lövhəni ziyarət edib, önünə tər çiçəklər düzüblər.

Görüşdə sakinlər tərəfindən işlə təminat, maddi yardım və digər sosial məsələlərlə bağlı müraciətlər səsləndirilib. Şəhər rəhbəri qaldırılan məsələlərin qısa müddətdə, qanunvericiliyə uyğun şəkildə həlli üçün aidiyyəti qurumların rəhbərlərinə müvafiq tapşırıqlar verib. Bəzi müraciətlər isə araşdırılaraq həll olunması məqsədilə qeydiyyata alınıb.

Vətəndaşlar onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya təşəkkürlərini bildiriblər.

Qəbuldan sonra Niyazi Bayramov N.Aydın adına 18 nömrəli tam orta məktəbin həyətində şagirdlərlə görüşüb. Şəhər rəhbəri onların asudə vaxtlarını səmərəli keçirmələrinin, təhsilə və idmana maraq göstərmələrinin vacibliyini vurğulayaraq öz tövsiyələrini verib.

Sonda məktəblilərlə xatirə şəkli çəkdirilib.